عرس ديمقراطي

عرس ديمقراطي

المشهد بالشقلوب

شفت أبو الريم مبارح المسا وسألني عن العرس اللي عزمنا عليه جارنا أبو أحمد من يومين، وقلي شو كيف كان العرس يا أبو بهيج.

صفنت هيك وقلتلو يا أبو الريم يا أخي الفرح لناس وناس، بتحس كأنو شعبنا ما بيعرف يفرح، مع أني كنت حالف بحياتي ما احضر أعراس بيت أبو أحمد، بس هالمرة ألح وأصر عليي، وأكدلي أنو العرس هالمرة رح يكون على ذوق الجميع، ومن دون أي مشاكل.

قلي أبو الريم: يا زلمة غريبة مع أني شفت صور على الفيسبوك تبريكات وتهاني لعيلة أبو أحمد وحسيت العالم مبسوطة..

قلتلو: ليش حضرتك يا أبو الريم عندك فيسبوك؟

قلي: أنا لا ما عندي بس كنت عم أكتب تقرير بما يتعلق بمجريات العرس منشان أرفعو لفوق.

قلتلو: لا يا أبو الريم بالعكس الناس كلها كانت مزعوجة، بس ما حدا بيسترجي يعلق بلسان بيت أبو أحمد.

قلي: بس أنت ليش ما عجبك؟

قلتلو: وعدنا أبو أحمد أنو يكون في بالعرس قائمة بالطعام ونحنا منختار منها اللي بدنا ياه، على عكس الأعراس السابقة اللي كانو يطعمونا فيها برغل كلو بحس قصدي بحص، ويضل يعملي مشاكل كذا سنة.

قاطعني أبو الريم وقلي: يعني هالعرس ما كان في قائمة بالطعام بتختار اللي بدك ياه؟؟

قلتلو: أي والله كان في بس يا سيدي إجا مدير المطعم وقلي بتختار الأطباق التالية، وما كان يخليني اختار الأكلات اللي بحبا، يا أخي يعني إذا السلق أرخص من الفريكة مجبور أكل فريكة أنا؟ يا أخي السلق كلو مواد مغذية أما الفريكة هية شوية برغل حرقوها وعملوها لحتى تصير الها شكل البشر..

قلي أبو الريم: وأنت ليش ما بتاكل فريكة، شو بدك بالسلق؟

قلتلو: بعرس أحمد أكلنا فريكة طلعت كلها مسوسة وخامة، وعملتلي مشاكل بالمعدة، وبعرس محمد أكلنا فريكة طلعت معفنة وطالعة ريحتها، وما استفدنا منها بشي، وبعرس محمود كمان طعمونا فريكة بالإجباري، طلعت روحنا من الفريكة وما بقى يغيروها.

قلي أبو الريم: طيب صاحب المطعم ما بيعرف أكتر منك، بلكي بيعرف أنو السلق اللي عندو مزروع جنب المجارير وما بيرضى يطعميك ياه؟..

قلتلو: يا أخي أولا هادا مدير المطعم، يعني موظف منشان يخدمني ويقدملي أفضل خدمة، يعني راتبو عم ياخدو بسببي أنا كوني ضيف على المطعم، وتاني شي ما ممكن تلاقي شي أوسخ وأقذر من هالفريكة بالمطعم هاد، تالت شي ليش عامل قائمة طعام إذا بدك تجبرني أكل اللي بدك ياه؟.

قلي أبو الريم: أي خلص ما بقى تروح على أعراس أبو أحمد، وروح على مطعم تاني..
قلتلو: لا خلص أعراس أبو أحمد محرمة عليي، بس المشكلة أنو ما في غير هالمطعم بالضيعة كلها.   



 

شارك برأيك .. لتكتمل الصورة


استطلاعات الرأي

يجب ان تختار خيار قبل ارسال التصويت
هل تعتقد أن الوقت قد حان لبدء تطبيق الدفع الإلكتروني في سوريا؟
نعم، حان الوقت لبدء تطبيقه وفرضه فوراً وهو ضروري للاقتصاد
لا، يجب إعداد بنية تحتية تقنية ومن ثم البدء بفرضه
لا، غير جاهزين بالوضع الراهن نهائياً لتطبيق الدفع الإلكتروني
النتائج
نعم، حان الوقت لبدء تطبيقه وفرضه فوراً وهو ضروري للاقتصاد
لا، يجب إعداد بنية تحتية تقنية ومن ثم البدء بفرضه
لا، غير جاهزين بالوضع الراهن نهائياً لتطبيق الدفع الإلكتروني

الأكثر مشاهدة هذا الشهر